إعرف إزاي شركة Lego أبدعت في ال Content Marketing

من كذا يوم كده رحت رحله لموقع Lego (الإلكتروني طبعا) .. بأعتبرها رحله لإن الموضوع كان ممتع جدا بصراحه، رحله إكتشفت فيها إنLego  من ال brands اللي فعلا تفوقوا في الcontent marketing .

أي شركه تقليديه حتلاقي موقعها مقتصر على أنواع المنتجات أو الخدمات اللي بتقدمها مع شوية معلومات عن الشركه و كيفية التواصل معاها و الأسئله الشائعه  (FAQ)و بس كده، لكن فيLego  الحكايه كانت أكبر من كده بكتير.

الموقع كان متقسم لأجزاء كتير جدا بس في شوية حجات لفتت نظري:

Lego Parents

في مساحه خاصه بالأباء إسمها Lego Parents بتديهم نصائح خاصه بالتربيه و تطوير مهارات أطفالهم بطرق شيقه مع توضيح مراحل النمو المختلفه و سمات كل مرحله، وطبعا مانسوش إنهم يذكروا أهمية الدور اللي ألعابLego  بتقوم بيه في تحسين عملية التفكير الإبداعي عند الطفل أو إنها بتغرز فيهم قيم التعاون، .. ألخ. كل الحجات دي مرفق معاها أنشطه عمليه و إرشادات في حالة تطبيقها.

وعشان يثبتوا للأباء إنهم حد جامد جدا عملوا قسم سموه Lego and Society بيوضح "بالتفصيل" مساهمتهم الفعاله في المجتمع وإزاي إن كان ليهم إضافه ضخمه و بصمه مميزه. ده غير إنهم خصصوا منتدى إسمه Lego Parents’ Café  للأباء عشان يدردشوا فيه براحتهم!

هنا الشركه نجحت في إنها تقنع الأباء بألعابLego  قبل الأطفال لأن في الأخر الأب أو الأم همه اللي ليهم السلطه الماليه .. يعني مش حيشتروا الحاجه لعيالهم غير لما يكونوا فعلا مقتنعين بيها و يا حبذا بقى لو الحاجه دي ليها فايده (و طبعا ده الليLego  بذلت فيه مجهود كبير عشان توصّله).

Lego Club

الجزء التاني من الموقع إسمه Lego Club. ده بقى تحس فيه إنك داخل عالم Disney بس بشخصيات Lego (على فكره ده برده في جزء فرعي خاص بال parents مع أنه مخصص في المقام الأول للأطفال).

المهم العالَم الخيالي ده حتلاقي فيه فيديوهات رسوم متحركه أبطالها شخصيات Lego و بتحكي قصص عنهم. كمان موجود فيه كتالوجات بتعلم الطفل إزاي يبني هياكل و أشكال مختلفه منها المعقد و البسيط. غير كده من خلاله الطفل ممكن يشترك في مجلة Lego المطبوعه و "المجانيه" اللي بيتم إصدارها 6 مرات في السنه. ضيف لده المسابقات اللي بتتنظم و ال online games.

 تفتكر حيكون أيه مدى تعلق الطفل ب Lego بعد كل ده؟ غالبا مش حيشوف قدامه غيرها! .. بل و حيحرص أنه يشتري دايما Lego في كل فرصه تجيلو. مش حتستغرب لو دخلت أوضته (غرفته) مره و لقيت فيها كل ال collection بتاعت Lego!

Lego Education

Lego Education بيستهدف المدرسين بصفه خاصه و المدارس بصفه عامه. بيشرح كيفية الإستفاده من ألعاب Lego على مدار المراحل التعليميه المختلفه عشان التعليم يتحول لعمليه ممتعه، و بيوفر كمان للمدرسين مواد تعليميه مجانيه متاحه على الموقع بتديهم أفكار لطرق تدريس مبدعه بإستخدام Lego.

من الأخر lego مش مجرد إنها عملت content تحفه يعجب الناس لكن دي عملت إمبراطوريه من المحتوى التسويقي اللي أستغلته عشان تحافظ على العلاقه بينها و بين عملائها الموجودين وتضيف شرائح جديده لجمهورها المستهدف.

ولما الشركه في 2014 نزّلت فيلم The Lego Movie كان طبيعي جدا إنه يلاقي إقبال كبير، بس المره دي الناس كانت مستعده إنها تدفع عشان تشوف ال content اللي Lego عاملاه لإنها واثقه من جودته اللي شافيتها قبل كده. موقع The Guardian قال تعليقا على الفيلم: The Lego Movie: Content Marketing at its Finest (فيلم ليجو: المحتوى التسويقي في أروع صوره)

الخلاصه إنك لما بتعمل content marketing بتبعد عن الجو الرخيص بتاع زمان - اللي الشركه فيه بترغمك إنك تشتري منهابالعافيه- و بتستبدله بمحتوى تسويقي بيدي للناس معلومات ببلاش بتفيدهم في حياتهم و في نفس الوقت ليها علاقه بالمنتج بتاعك .. و مع الوقت لما يتأكدوا إن إنت حد مصدر ثقه حتلاقي إنهم تلقائي حيحرصوا إنهم يشتروا منتجك.